வஞ்சிக் காண்டம்-நீர்ப்படைக் காதை-(எளிய விளக்கம்:பகுதி 8)

nklogo   நீர்ப்படைக் காதை

13.காலம்
nk8

அகல்வாய் ஞாலம் ஆரிருள் விழுங்கப்,
பகல்செல முதிர்ந்த படர்கூர் மாலைச்,
செந்தீப் பரந்த திசைமுகம் விளங்க 145
அந்திச் செக்கர்,வெண்பிறை தோன்றப்
பிறையேர் வண்ணம் பெருந்தகை நோக்க
இறையோன் செவ்வியிற் கணியெழுந் துரைப்போன்
எண்ணான்கு மதியம் வஞ்சி நீங்கியது
மண்ணாள் வேந்தே வாழ்கென் றேத்த 150

அகன்ற இடத்தையுடைய பூமியை அரிய இருட்டு விழுங்க இடம் தந்து,பகல் மேற்குத் திசை சென்று மறைந்தது.பிரிந்தக் காதலர்களுக்கு மிகுந்த வருத்தத்தைச் செய்யும் மாலை என்னும் செந்நெருப்பும் மேற்குத் திசையில் எழுந்து பரந்து விளங்கியது.அத்தகைய அந்திப் பொழுதில்,சிவந்த வானில் வெண்மையான பிறைச் சந்திரன் தோன்றியது.

பிறையின் அழகிய வண்ணத்தை,பெரும் தகுதி வாய்ந்த செங்குட்டுவன் பார்த்துக் கொண்டிருந்தார்.அவர் அவ்வாறு பிறையைப் பார்த்த மாத்திரத்தில்,அங்கிருந்த காலத்தைக் குறிக்கும் காலக்கணிதன்,காலத்தைத் தான் மன்னன் யோசிக்கிறார் என்று எண்ணி அதை விளக்க ஆரம்பித்தார்.’மண்ணை ஆளும் மன்னனே!நாம் வஞ்சி நகரை விட்டு வந்து முப்பத்திரண்டு மாதங்கள் ஆகின்றன’,என்றுக் கூறி,’நீ வாழ்க!’, எனச் சேரன் செங்குட்டுவனைப் பாராட்டினார்.

குறிப்பு

  1. அகல்வாய்-அகன்ற இடம்
  2. ஞாலம்-உலகம்
  3. ஆரிருள்-அரிய இருள்
  4. படர்கூர்-மிகுந்த துன்பம் (படர்-துன்பம்:கூர்-மிகுந்த)
  5. செக்கர்-சிவப்பு,செவ்வானம்
  6. அந்தி-இரவு
  7. ஏர்-எழு
  8. பெருந்தகை-பெரிய தகுதி (தகை-தகுதி)
  9. இறையோன்-காக்கும் மன்னன்
  10. கணி-காலக்கணிதன்
  11. எண்ணான்கு-8*4=32 முப்பத்திரண்டு
  12. மதியம்-திங்கள்,மாதம்
  13. ஏத்த-போற்ற

14.ஓவியப் பந்தல்

நெடுங்காழ்க் கண்டம் நிரல்பட நிரைத்த
கொடும்பட நெடுமதிற் கொடித்தேர் வீதியுள்,
குறியவும் நெடியவுங் குன்றுகண் டன்ன
உறையுள் முடுக்கர் ஒருதிறம் போகி,

வித்தகர் கைவினை விளங்கிய கொள்கைச், 155
சித்திர விதானத்துச் செம்பொற் பீடிகைக்
கோயி லிருக்கைக் கோமகன் ஏறி

கணியன் கூறியதைக் கேட்டவுடன்,நீண்டக் குத்துக்கோலுடன் பூவால் ஆனத் திரைகளைச் சேர்த்து வரிசையாக நிறைந்த,வளைந்த படங்களாகிய நீண்ட மதிலுடைய,கொடிக் கட்டியத் தேர்கள் நிற்கின்ற வீதிக்குள் மன்னர் சென்றார்.

சிறிதும்,பெரிதுமான மலைகளைக் காண்பது போல இருக்கும் வீடுகள் இருந்தக் குறுந்தெருவின் ஒரு பக்கமாகச் சென்று,ஓவிய நூல் கற்றப் புலவரின் கைவேலை முழுதையும் காட்டும் ஓவியப் பந்தல்கள் அமைந்த,அரண்மனைக்கு உரிய,செம்பொன்னால் செய்த இருக்கைக்குச் சென்று அமர்ந்தார்.

குறிப்பு

  1. காழ்-குத்துக்கோல்
  2. கண்டம்-கூறுபாடு,பிரிவு
  3. நிரல்-வரிசை
  4. நிறைத்த-நிரப்பிய,நிறைந்த
  5. கொடும்பட(ம்)-வளைந்த திரையாக போடப்படும் துணி
    (கொடும்-வளைந்த:படம்-படங்கு,கூடாரம்,திரை)
  6. நெடுமதில்-நீண்ட மதில்
  7. கொடித்தேர்-கொடி கட்டிய தேர்
  8. குன்று-மலை
  9. உறை-இல்லம்,இருப்பிடம்,வீடு
  10. முடுக்கர்-குறுந்தெரு
  11. திறம்-பக்கம்
  12. போகி-சென்று
  13. வித்தகர்-புலவர்
  14. சித்திர-ஓவிய
  15. விதானம்-பந்தல்
  16. பீடிகை-பீடம்
  17. கோயில்-அரசனின் இல்லமான அரண்மனை (கோ-அரசன்:இல்-இல்லம்)
  18. கோமகன்-அரசன்

dp

 - மீனாட்சி தேவராஜ்

meenbas16@yahoo.co.in

This entry was posted in சிலப்பதிகாரம் -எளிய உரை, சிலப்பதிகாரம்-வஞ்சிக் காண்டம் and tagged , , , , , , , , , , , , , , , , , , , , , , , , , , , , , , , , , , , , , , , , , , . Bookmark the permalink.

Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>